ਨੇਪਾਲ 'ਚ ਮੁੜ ਕੰਬੀ ਧਰਤੀ: ਉੱਤਰ-ਪੱਛਮੀ ਇਲਾਕੇ 'ਚ ਪਏ ਭੂਚਾਲ ਦੇ ਦੋ ਲਗਾਤਾਰ ਝਟਕੇ, ਦਹਿਸ਼ਤ ਦਾ ਮਾਹੌਲ

ਉੱਤਰ-ਪੱਛਮੀ ਨੇਪਾਲ ਵਿੱਚ ਬੁੱਧਵਾਰ ਤੜਕੇ ਆਏ ਭੂਚਾਲ ਦੇ ਦੋ ਲਗਾਤਾਰ ਝਟਕਿਆਂ ਨੇ ਸਥਾਨਕ ਲੋਕਾਂ ਵਿੱਚ ਭਾਰੀ ਸਹਿਮ ਪੈਦਾ ਕਰ ਦਿੱਤਾ। ਰਾਸ਼ਟਰੀ ਭੂਚਾਲ ਖੋਜ ਕੇਂਦਰ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਪਹਿਲਾ ਭੂਚਾਲ ਤੜਕੇ 1:51 ਵਜੇ ਦਰਜ ਕੀਤਾ ਗਿਆ, ਜਿਸ ਦੀ ਰਿਕਟਰ ਪੈਮਾਨੇ 'ਤੇ ਤੀਬਰਤਾ 4.5 ਮਾਪੀ ਗਈ। ਇਸ ਭੂਚਾਲ ਦਾ ਕੇਂਦਰ ਮੁਗੂ ਜ਼ਿਲ੍ਹੇ ਦੇ ਕਲਾਈ ਖੇਤਰ ਦੇ ਨੇੜੇ ਸਥਿਤ ਸੀ।

ਇਸ ਤੋਂ ਬਾਅਦ ਅਜੇ ਲੋਕ ਸੰਭਲ ਹੀ ਰਹੇ ਸਨ ਕਿ ਸਵੇਰੇ 4:28 ਵਜੇ 4.2 ਤੀਬਰਤਾ ਦਾ ਦੂਜਾ ਝਟਕਾ ਮਹਿਸੂਸ ਕੀਤਾ ਗਿਆ। ਦੂਜੇ ਭੂਚਾਲ ਦਾ ਕੇਂਦਰ ਵੀ ਮੁਗੂ ਜ਼ਿਲ੍ਹੇ ਦਾ ਕਲਾਈ ਇਲਾਕਾ ਹੀ ਰਿਹਾ। ਇਨ੍ਹਾਂ ਝਟਕਿਆਂ ਦਾ ਅਸਰ ਗੁਆਂਢੀ ਜ਼ਿਲ੍ਹਿਆਂ ਡੋਲਪਾ ਅਤੇ ਜੁਮਲਾ ਵਿੱਚ ਵੀ ਦੇਖਣ ਨੂੰ ਮਿਲਿਆ, ਜਿੱਥੇ ਧਰਤੀ ਕੰਬਣ ਕਾਰਨ ਲੋਕ ਡਰ ਦੇ ਮਾਰੇ ਘਰਾਂ ਤੋਂ ਬਾਹਰ ਨਿਕਲ ਆਏ।

ਹਾਲਾਂਕਿ, ਰਾਹਤ ਦੀ ਗੱਲ ਇਹ ਰਹੀ ਕਿ ਪ੍ਰਸ਼ਾਸਨ ਵਲੋਂ ਫਿਲਹਾਲ ਕਿਸੇ ਵੀ ਤਰ੍ਹਾਂ ਦੇ ਜਾਨੀ ਜਾਂ ਮਾਲੀ ਨੁਕਸਾਨ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। ਨੇਪਾਲ ਭੂਗੋਲਿਕ ਤੌਰ 'ਤੇ ਸੰਵੇਦਨਸ਼ੀਲ ਜ਼ੋਨ ਵਿੱਚ ਹੋਣ ਕਰਕੇ ਇੱਥੇ ਭੂਚਾਲ ਦੀਆਂ ਗਤੀਵਿਧੀਆਂ ਅਕਸਰ ਹੁੰਦੀਆਂ ਰਹਿੰਦੀਆਂ ਹਨ। ਸਬੰਧਤ ਏਜੰਸੀਆਂ ਬਾਅਦ 'ਚ ਆਉਣ ਵਾਲੇ ਝਟਕਿਆਂ (Aftershocks) 'ਤੇ ਨਜ਼ਰ ਰੱਖ ਰਹੀਆਂ ਹਨ ਅਤੇ ਅਧਿਕਾਰੀਆਂ ਨੇ ਆਮ ਲੋਕਾਂ ਨੂੰ ਚੌਕਸ ਰਹਿਣ ਦੀ ਅਪੀਲ ਕੀਤੀ ਹੈ।